Wacana tambahan tentang durung durung

Taringot DURUNGDURUNG


Angka dongan na pinarsangapan! Horas

Domu tu durungdurung on, adong do sarito na geok. Di sada tingki, di pardalanan mulak sian parsingkolaan, marnonang ma sahalak anak ni pandita dohot sahalak anak ni pangansara (penasehat hukum). Manang boha ma dalanna, sahat ma parnonangon i tu na patudu hajagoon ni amongna be.

Didok anak ni pangansara i ma songon on: "Asa diboto ho, amongku na bahatan hepengna. Sahali manghatai amongku satas hepeng alona!"

"I do ate! Na jago ma tutu amongmi! Alai, jumago dope amongku. Molo amongku, sahali manghatai, ingkon adong ualu halak markira hepeng alona i. I pe ingkon pola sahat tu dua jom i kiraonna asa sidung", ninna anak ni pandita i mangalusi so pola dirgak simanjujungna.

Manigor hohom ma anak ni pangansara i umbegesa alus i. Tung so dietong rohana songon i jago ni among ni kedanna i.

Laos huingot ma muse parnonangon ni angka dongan di sada lapo di dingkan Padang Bulan nantoari manogotna, Jumat (14/10/2016, pukul 8.20 WIB). Didok sahalak dongan na tongon juguk di karosi dingkan jolonami, boti: "Adi perlu sen galang i tukarken ku sen kitik, reh saja ku GBKP dung acara kebaktian. I jei melala kel sen kitik pecahen erga seribu ras erga dua ribu rupiah." "Nggak hanya ke GBKP, ke HKBP juga, kalau perlu", ningku ma mangantoi. Rap margahargak ma hami ala erget ni panghataion i.

"Bukan itu saja!", ninna dongan na di lambungku  muse mangambai. Ada kawan, waktu mau mengikuti kebaktian, tiba-tiba membeli sebungkus rokok, sambil meminta uang receh 2000an untuk kembalian uangnya yang pecahan 20.000 rupiah itu. Udah gitu, pas mau ngasih persembahan digopugopunya uang pecahan 2000 rupiah itu. Tega kali dia memberi persembahan begitu kepada Tuhan!", ninna muse huhut hira na muruk bohina idaon. "Bah, ai sipata olo do hape tingkos hatam! Ai ho dope nuang na manghatai on?", ningku ma hubut husirup tes manis na mohop i dope.

Memang, toho do jala olo do jotjot masa rumang ni na dihatai na di ginjang i. Ndada na manguhumi, rupani, tung somal do raus jala leas rohanta pasahathon peleanta tu Tuhan i, songon na dipatudos na di ginjang i. Ndang apala na mandok na ingkon na gumodang pelehononta, alai anggo tung pola do sorohononta pemenekhon hepeng arga lima ribu, sampulu ribu, manang dua puluh ribu gabe uang metmet arga dua ribu asa adong pelehononta, hita ma na manimbangi hapatutonna. Jala, muse, ingkon gopuonta i uju pasahathon, tarimangrimangi ma di bagas rohanta, toho do ias rohanta pasahathon i?

Alai, ambal ni hata tahe, "Boasa di hata Batak pelean manang persembahan i didok durungdurung?" Ra marharoroan ma i sian hata 'kollekte', na nienet sian hata 'collecta' (Latin) na marlapatan sumbangan untuk makan bersama, pengumpulan, rapat atau sidang. Di hata Inggeris didok ma 'to collect' (hata horja), na marlapatan papunguhon.

Di hata Batak, durungdurung marharoroan sian hata 'durung'. Durung ima sada parkakas na dipangke manangkup dengke, isara ni ihan mas, siopat, pora pora, asa asa, sibahut, haruting, dohot simanje (kapala tima). Durung ima songon jaring na ditaon di bagasan aek (isara ni di hauma, bimondar, manang binanga, anggiat tung adong angka dengke na tarjergot disi. Disintak ma durung i jalo unang sanga sumurut nasida ruar.

Lao mangarahon angka dengke i bongot tu durung i dipangke ma tumbaktumbak. Tumbuktumbak dipauli sian bulu marhite na mamonggol bulu i marhira  dua dopa ganjangna. Diponggol ma bulu hirahira sanjokkal dingkan toru ni buhu na i. Ditebahon hibul tong hira sanjongkal. Asingna i dibola ma asa une tiopon manang golomon ni tangan.

Dung ditaon durung i ditullangi ma aek i dohot tumbaktumbak i, malloboblobob, marhaliang asa bongot angka dengke na adong di bagas aek i tu durung i. Dung i, dihinsat manang disintak ma durung i laho marnida etak na adong dengke tardurung. Molo adong dengke dapot, pinapamasuk ma i tu bagas isianna na sangkot pinarhorunghorung. Isianna i pe tong do dipauli sian buhu ni bulu. Manjalahi dengke na songon on didok ma mandurung. Papunguhon dengke ma lapatan ni.

Di hata Batak, manggonti horong ni hata, isara ni hata horja (kata kerja) gabe hata ugasan (kata benda) diulahon ma i marhite na mangulahi hata dasorna. Tudosanna, molo hata 'mangalean' (hata horja), sian hata dasor 'lean' giot digonti gabe hata ugasan, diulahi ma hata dasor i gabe leanlean manang sileanlean. Songon i ma tong hata mandurung (hata horja), sian hata dasor 'durung' digonti gabe hata ugasan gabe 'durungdurung'.

Durungdurung marlapatan hepeng (hata ugasan) na pinapungu. Sian pangantusion on ma ra marharoroan hata durungdurung i. Papungu hepeng (pelean) tu jolo didok ma i mandurung tu jolo.

Mulak ma hita muse tu durungdurung parsaribuan, parduaribuan, dohot na ginopu i. Ninna roha, nunga tingkina ingkon ubaonta pola pikir manang pangantusionďd domu tu na pasahat pelean manang durungdurung i. Tarimangi ma jolo manat, tung une dope nasai pelehononta nuaeng on, asam ni tolu bonbon pintoria? Toho do ias roha pasahathon i molo ginopu do i, pola mansai gopu?

Adong do muse mandok, "Ai so binoto i, manang na tu dia angka durungdurung na nilehon i. Ai lam godang hepeng lam godang do parbadaan di huria i!" Bope tupa na songon i, ndang gabe i alasanta mangholit pelean. Unang alani gabe dohot hita mardosa marhite pelean na tapasahat.

Alani, tapasahat ma peleanta sian ias ni roha. Jala unang hita lupa, ias ni roha marhadomuan do tu asam ni pelean na patut sipelehononhon. Jala une ma i tapasahat so pola manggopu, asa unang sai loja na ualu halak na hudok di ginjang i pauneunehon i andorang so dietong. I do pelean na hussus hombar tu Surat ni Apostel Paulus tu Huria Rom, di Rom 12 ayat 1 i.

Tuhanta, marhite Tondi Parbadia, ma na patauhon hita mamelehon patumona ni pasaupasu na tajalo sian Tuhan i.