SEJARAH HAJONGJONGAN HKI HUTASOIT PARDOMUAN

Sejarah Hajongjongan Ni HKI Resort Khusus Hutasoit Pardomuan[1]

I.                   Patujolo

Dung ojak hata Ni Debata di Tano Batak marhite parbarita Nauli na sian Jerman ima Dr. Ingwer Ludwing Nommensen (Apostel Ni Halak Batak). Jala Lam rarat do barita Nauli i lam godang angka Huria Najonjong. Laos Jonjong ma HChB/Huria Kristen Indonesia di Pantoan, Pematang Siantar. Lam tu hembang na do Huria HChB/HKI di tano Batak songoni nang diluat Humbang lumobi di negara Indonesia on. Masihol jala mauas ditutu do halak Batak diparhuriaon, songoni nang angka natua-tua di luat Hutasoit Pardomuan on. Sian las ni roha dan hasadaon ni roha ni Natua-tua diluat on, dipanjongjong ma Huria. Disihol jala diuas ni roha nasida i gabe ojak Huriana HKI di Hutasoit Pardomuan on. Di pesta Jubileum 75 taon HKI Hutasoit Pardomuan sadarion naeng pajojoron nami ma sejarah ni parjonjongan ni Huria on.

II.                Mula Ni Hajongjongn Ni HKI Hutasoit Pardomuan

Di taon 1939 ndang adong dope jongjong Huria di luat on. alai adong do masyarakat  di luat on marhuria/margareja lao tu ima: HKBP Sabungan siborong-borong, HKBP Pearaja sitabo-tabo, HKBP Hutanamora Butar. Ala marserak parmingguon i, tubu ma di roha ni angka natua-tua na diluat on patupahon dos ni roha laho pajongjong gareja di luat on. laho padoshon tahi i, dipatupa ma parpunguan di jabu ni amanta Raja Luther Hutasoit di Huta Ambar Bolak. Angka natua-tua namarpungu ima:

1.      Raja Luther Hutasoit sian Huta Ambar Bolak

2.      St. Tepanus Hutasoit sian huta Ambar Bolak

3.      Manongap Hutasoit sian Huta Ambar Bolak

4.      Paulus Hutasoit sian Huta Ambar Bolak

5.      Artius Hutasoit sian Huta Ambar Bolak

6.      Toga Hutasoit sian Huta Lumban Lobu

7.      Raja Petrus Hutasoit sian Huta Lumban Lobu

8.      Josia Hutasoit sian Huta Lumban Lobu

9.      St. Karal Hutasoit sian huta Lumban Lobu

10.  St. Albert Hutasoit sian Huta Parhinjangan

11.  Kampung Alle Hutasoit sian Huta Parhinjangan

12.  Nahanson Hutasoit (Op.Halio) sian Huta Pisang

13.  Lukas Lumbantoruan sian Huta Pisang

14.  Liberti  Hutasoit sian Huta Siaro

15.  Mulia Hutasoit (Op.Poltak) sian Huta Siaro

16.  Lemeri Pasaribu sian Huta Sosor Tambak

17.  Op.Toras Pasaribu sian Huta Sosor Tambak

18.  Marthin Lumbantoruan sian Huta Siarungarung

19.  Heman Hutasoit sian Huta Lumban Pea

20.  Henneri Hutasoit (siparnapuran) sian Lumban Lobu

21.  Hendrik Hutasoit sian Lumban Gaol

Diparpunguan i, dapot do dos ni roha ni natua-tua laho pajongjong gareja di luat on, laos satolop do nasida mandok: Gareja HChB ma tapajonjong. Laos dipajonjong ma gareja di luat on dipekarangan/ ditano dohot ukuran 120 M x 60 M. Jala tano ni hajongjongan ni gareja on sian Kel.Op.Maringan Hutasoit, Kel.Op.Halembang Hutasoit, dohot Kel.Manongap Hutasoit. Didos ni roha ni nasida di hubul ma  ari laho margotong-royong, adong namambuat hau dohot ri (lalang)bahen tarupna. Jadi dipatupa ma gareja i mardorpi bukki jala martarup lalang/ramba. Dung sidung dipajonjong gareja i dipatupa ma kebaktian/parmingguan pamuhai naniuluhon ni amanta Pdt.Willem Lumbantoruan (Pendeta HChB Bahal batu) ima di tanggal 09 Oktober 1939 laos on ma haojak no Huria on, digoarma huria i HChB Hutasoit Pardomuan. Laos sian on ma goar ni luat on Hutasoit Pardomuan sahat tu saonnari. Di parmingguon pamuhaion on diojakhon do amangta Josia Hutasoit na gabe Gr. Huria dohot angka sintua ima: St. Tepanus Hutasoit, St. Karal Hutasoit, St.Albet Hutasoit, St. Jayas Hutasoit. Torop ni ruas di tingki i 50 KK/rumah tangga;200 jiwa.

Dung mardua taon (1941) Jonjong ma gedung gereja, dipaimbaru jala ditambai ma bidangna, gabe mardorpi papan martarup seng. Laos dipapinda sian inganan na parjolo tu haojahan ni gareja sisaonnari. Ditingki i ma marganti amanta Pdt. Gabriel Lumbantoruan na gabe pendeta resort. Laos ganti musema Guru Huria gabe amanta Liberti Hutasoit, ihutma dipatupa panabalan ni sintua laho manambai sintua naung adong. Ia angka sintua natartabal i ima,: St.Markus Hutasoit, St. Willem Pasaribu, St.Julius Hutasoit, St. Firman Lumbantoruan, St. Ferdinan Hutasoit, St. Idan Hutasoit, St. Samuel Hutasoit, St.Mauli Hutasoit.

Dung patolu taonton sian hajongjongan ni Huria on tahun 1942 mansai malungun do angka ruas ni Huria diangka parbinotoan(pendidikan) gabe dipatupa ma parsiajaran tu ianakkon ni ruas on ima tingkat SR (Sekolah Rakyat), di gereja do dipatupa parsiajaran i. Ia namangajari ima amanta Samuel Pasaribu, Apul Hutasoit, dohot Jamidun Hutasoit, laos sian ruas ido gaji ni nasida. Ndang sadia leleng diusulhon angka natua-tua ma tu pamarenta asa dipajonjong SR negeri, saut do dioloi pamaretta (pemerintah) pangidoan i gabe laos jongjong ma parsikkolaan SR Negeri Hutasoit Pardomuan. Dungi marganti ma muse goar ni Sikkola i SD (Sekolah Dasar) Negeri Hutasoit Pardomuan ima SD na di jolo ni gareja on. Laos Huria on do pasahat tano pekarangan ni sikkola on tu pamarentta dohot ukuran 41m x 71 m. Dung di taon 1961 manerak ma deba ruas ni Huria on, gabe dipajongjong nasida ma Huria GKI ima GKI-SUMUT siborong-borong si nuaeng. Alai nangpe mamungka huria naimbaru nasida, ndang pola mambahen hagaleon di ruas ni Huria on, alai lam martamba-tamba do ruas ni huria on. ala naung tamba ruas ni huria jala torop naung marujung ngolu ima angka sintua na parjolo i, gabe di patupa muse panabalan sintua, ima: St.Jonggi Hutasoit, St.Basta Hutasoit, St.Sabam Hutasoit, St.Darianus Hutasoit, St. Jonggi Hutasoit (sian huta Lumban Lobu), St.Muara Pasaribu, St. Manuel Pasaribu, St. Waldemar Hutasoit, St. Mulia Hutasoit, St. Salomo Hutasoit, St. Walter Situmorang, St.Ardin Lumbantoruan, St.Victor Nababan.

Dipardalanan ni huria on di ganup taon lam martamba do ruas ni huria. Ala lam tu toropna ruas ni Huria on jala lam tu hopitna fisik gedong ni gareja on, dungi mardos roha ma sude ruas ni Huria dohot parhalado, alani i di taon 1968 dipabalga ma muse gareja on gabe semi permanen (satonga beton) dohot ukuran 10 m x 24 m. Dungi di taon 1971 laho ma manombang deba ruas ni Huria on tu RantauParapat ima di Kampung Padang jala laos dipajongjong nasida Huria HKI Pardomuan Nauli Kappung Siborong-borong naniuluhon ni amanta Pdt.A.B. Sormin (Pendeta Resort Hutasoit pardomuan) dohot angka parhalado sian huria on. jala laos dipasahat Huria on do 1 Agenda, 1 Bibel, 1 Buku Ende, ala pangaratto ni huria on do nasida laos umbahen ido dipajongjong nasida HKI di Kp.Padang.

Dung di taon 1977 tubu ma roha ni deba ruas ni Huria on naeng pajongjong gareja HKI di Kota Siborong-borong ala jonok di kota Siborongborong dang adong dope hurianta HKI ditingki i. Jadi laos dibahen nasida ma goar ni Huria i HKI Siborong-borong Kota si nuaeng. Ala naung godang angka sintua namatua jala hurang gogo, ditabalhon ma muse angka sintua ima: St.Poren Siburian, St.Jaiman Aritonang, St.Mangampin Hutasoit, St. Peres Hutasoit, St.Mangapul Pasaribu. Dung adong marpiga-piga taon diuduti ma muse panabalan tu sintua ima: St. Junus Hutasoit, St. Muara Hutasoit. Dungi penabalan namangihut ima: St.Budiman Lumbantoruan, St. Jansen Hutasoit, St. Ramot Hutasoit, St. Sahat Manalu, St. Pasal Hutasoit. Dungi t mangihut muse ima: St. Togar Lumbantoruan, St. Marhusor Hutasoit, St. Renta br.Sinaga, St. Rindu br. Hutasoit, St.Bona Hutasoit, St. Maurid Hutasoit. St. Tardi Pasaribu, St. T.br.Nababan.

Dirajumi huriaon do pandonganion dohot pangaramotion ni Debata dipardalanan ni HuriaNa, ala ni tubu ma sada ni roha di ruas dohot parhalado ni Huria patupa Pesta Jubeleum 50 taon HKI Hatasoit Pardomuan di taon 1989 (ditingki i Pdt.B.T Panjaitan pendeta resort). Pesta i diuluhon ni amanta Ephorus (Emeritus) Pdt.W.J.Sirait, jala torop ni ruas ditingki i 110 KK: 520 Jiwa.

Nunga lam  matua gedung gareja na dibangun di taon 1968, jala lam taon tu taon marganti soring lam torop muse ruas ni Huria on songon hamajuon ni zaman. Dibahen dos ni roha ni Huria on naeng muse dipabalgahon gareja on dohot marehap gedung gareja on. alani sian dos niroha i dipatupa ma pembangunan fisik mulai taon 2003 dohot ukuran 12 m x 26 m permanen. Laho paujunghon/pasikkophon bangunan on sai dipatupa huria on do guguan ganup taon sahat tu tingki on. Huhut manambai Huria guguan ni ruas i sai dipatupa huria on do pesta pembangunan asa humatop sikkop bangunan on. Pesta i dipatupa di taon 2006 ima naniuluhon ni amanta Ephorus Pdt.Dr.Burju Purba (Emeritus), jala laos diottang huria on do amanta Bupati Kab.Taput ditingki i amanta Torang Lumbantobing dohot rombongan, jala dohot do amanta Ketua DPRD Kab.Taput mangadopi pesta i.

Sai diusahahon Huria on do asa lam sikkop pembangunan fisik ni gareja on, tanggal 25 Oktober 2009 dipatupa muse Jubelium 70 taon HKI Hutasoit Pardomuan na niuluhon ni amanta Ephorus Pdt.Dr.Burju Purba (Emeritus) dohot angka rombongan (majelis pusat, Preses daerah IX Humbang, Para pendeta Resort daerah IX Humbang). Di Pesta i di ottang do amanta Bupati alai dang boe ro, jala holan rombongan do (songon angka stafna dohot anggota DPRD Kab.Taput) , jala godang ni ruasta dijubelium 70 taon ima 170 KK; 720 Jiwa. Dang Holan Bupati Taput, dohot do di ottang huria on Bupati Humbang Hasundutan ima amanta Drs. Budiman Sihombing dohot rombongan sian pamarentta nadi Humbang. Di dosniroha jala mardongan pos niroha tu Tuhan i, Huria HKI Hutasoit Pardomuan on tongtong do margogo laho pahembanghon huria ni Tuhani. Jala alani, sai dirajumi rohani ruas nang angka parhaladona do angka denggan basa ni Tuhani. Jala tepat apala di na sadarion, gonop ma umur ni Huriaon mulai Hajongjonganna tanggal 09 Oktober 1939-09 November 2014 marumur 75 taon. Sian pangarajumion ido naeng marlasniroha Huria on sahat tu sadarion tongtong manjalo angka basa-basa ni Tuhani. Sai anggiat ma penarsitta ni Huriaon gabe Huria nabalga nang angka ianakkon ruasna pe gabe jolma na sukses laho pahembanghon huriana HKI.

III.             Angka Naung Mangula di Huria

Huria naung gok umur, godang nang ruasna, songon pardalanan ni hamajuon ni zaman songon ni do nang partamba ni ruas. Marganti soring do angka ari, bulan dohot taon natabolus songon ido nang angka pangula ni Huria tongtong do marganti soring. Angka on ma namangula ditonga-tonga ni Huria sian haojahan ni Huria sahat tu sadarion;

1.      Guru Huria

1.      Gr. Josia Hutasoit sian taon 1939 s/d 1941

2.      Gr.Liberti.Hutasoit sian taon 1941 s/d 1982

3.      Gr.P.Hutasoit sian taon 1982 s/d 1990

4.      Gr.Junus Hutasoit sian taon 1990 s/d 2002

5.      Vic.Pdt.Hugo Nababan sian taon 2002 s/d 2003

6.      Biv.N.br.hasibuan sian taon 2003 s/d 2005

7.      Vic.Gr.Juris Tanjung 3 Bulan taon 2005

8.      Vic.Pdt.Irene Sihotang sian taon 2005 s/d 2007

9.      Vic.Pdt. Sehat Panjaitan sin taon 2007 s/d 2008

10.  Vic.Pdt.R.br.Sianturi sian taon 2008 s/d 2010

11.  Vic.Pdt.Nelly Butar-butar taon 2010-

2.      Pandita

1.      Pdt. Wilhem Lumbantoruan sian taon 1939 s/d 1941

2.      Pdt. Gabariel Lumbantoruan sian taon 1941 s/d 1968

3.      Pdt.Albinus B.Sormin sian taon 1968 s/d 1976

4.      Pdt. O.T. Harianja sian taon 1976 s/d 1977

5.      Pdt. M.A.E. Samosir parhohas sian Preses Daerah IV Humbang sian taon 1977 s/d 1983

6.      Pdt. D.Panjaitan sian taon 1983         

7.      Pdt. Bistok Hutasoit sian taon 1983 s/d 1986

8.      Pdt. B.T. Panjaitan sian taon 1986 s/d 1991

9.      Pdt. Muda Sihotang sian taon 1991 s/d  1995

10.  Pdt. R.Naomi.br.Simarmata M.Th sian taon 1996 s/d 2003

11.  Pdt.B. Sihombing S.Th sian taon 2003 s/d 2009

12.  Pdt.Likson.F. Simanjuntak S.Th sian taon 2009 s/d 2012

13.  Pdt. Rotua Silitonga MM sian taon 2012/2014

14.  Pdt. Daniel Borando Pane S.Th-Saonnari

IV.             Pardalanan Ni Huria sian Najongjong Sahat tu Saonnari

Dipardalanan ni Huria on sian najongjong sahat tu saonnari tung godang do angka hamaolon ni adopan ni huria, lumobi ma angka ruas ni huria. Songon hamaolon dihamajuon ni zaman/ tingki songon i do nang hamaolon dipardalanan di Huria on. nang pe godang hamaolon diadopi huria nang angka ruas tong do diramoti, diparmudu-mudu dohot pasu-pasu ni Tuhan i, umbahen boi do dipatupa angka pembangunan secara fisik nang pertondion ima marhite angka partangiangan na pinatupa ni Huria di ganup bagas ni angka ruas. Ala pangaramotion, pamasu-masuon ni Debata dipardalanan ni HuriaNa sahat tu tanggal 09 November 2014 on boho ma Huria on marumur 70 taon lobih sabulan, laos sadarion ma tahalashon, manghamuliatehon pandonganion ni Tuhan i umbahen boe tarpatupa Huria on pesta Jubelium 75 taon HKI Resort Khusus Hutasoit Pardomuan. Lam martamba-tamba do ruas ni Huria sian namamungka sahat tu sadarion, ia godang ni ruas sahat tu sadarion....

V.                Penutup

Sian namamungka sahat tu tingki on tung mansai godang do hamaolan diadopi Huria on, lumobi di angka natua-tua naparjolo pajonngjong huria nabalga on nang angka namanghobasi di huria on. alani i tapaunduk ma jolo rohanta satongkin laho marningot/merenungkan sude angka pambahenan dohot ulaon nasida lumobi ma diangka naung marujung ngolu sian tonga-tonganta. Tatangiangkon ma asa anggiat lam manahan huria on diangka hamaolon tu joloon, jala lam tu ringgasna huhut tu toropna ruas ni Huria mangharingkotton ngolu ni partondion asa marsangap Tuhan i.

Akhir kata: Dirgahayu Gerejaku, Dirgahayu Jemaatku, Selamat Ulang Tahun 75 Taon HKI Resort Khusus Hutasoit Pardomuan, Tuhan Memberkati, Syalom, Horas

NB: sebagai masukan: untuk mengharapkan tulisan sejarah yang baik dan enak dibaca. Maka menurut penulis ulang (penyunting) masih banyak yang perlu dibenahi dalam tulisan singkat tentang Sejarah HKI Hutasoit Pardomuan ini.  Penulis sangat mengharapkan masukan-masukan dari Penatua-penatua (orang tua yang tahu dengan keadaan HKI ini). Jadi mohon dikoreksi. Ada pun hal-hal yang diperbaiki yaitu

1.       Tentang Konteks perkampungan Hutasoit Pardomuan (baik konteks keagamaan, budaya, politik, sosialnya)

2.       Dalam setiap rententan peristiwa tahun ke tahun sejarah ini, kurang jelas dicatat sejauh mana perkembangan  jemaatnya.

3.       Setiap peristiwa penting masih ada kehilangan tahun atau tidak diketahui waktunya.

4.      Dan lain-lain.

---

[1] Sumber Asli dari Dokumen Sejarah Parjonjongan Ni HKI Hutasoit Pardomuan oleh Op.Patiasima Hutasoit (Tim Sejarah Jubileum 70 taon HKI Hutasoit Pardomuan tanggal 25 Oktober 2009) disunting kembali  oleh Ampu Supriadi Hutasoit